El Teixu, Rede pal Estudiu y Defensa de la Llingua Asturllionesa, empicipióu esta sumana nel municipiu de Torenu una campaña de retulación de locales públicos, cono títulu “Na llingua de casa”. Con esta iniciativa, l’asociación quier faer visible l’asturllionés nos espacios de socialización cotidiana, de manera que la llingua estía presente con normalidá, por voluntá de la xente y porque presta vela, nesos ámbitos a los que güei nun chega.
Cono obxectivu de visibilizar l’asturllionés nos municipios citaos, los miembros y colaboradores d’El Teixu están repartiendo de balde polos comercios y establecimientos públicos de la zona trés tipos distintos de carteles. Los primeros sirven pa indicar si los locales están abiertos o pechaos (¡Pasái! esti sitiu está abiertu / Sentímoslo, esti sitiu está pecháu), outros pa señalar la dirección na qu’abren las puertas (tirare / emburriare) y, p’acabar, los últimos distinguen los baños de muyeres y d’homes. Están disponibles con diseños y colores variaos pa poder adaptase meyor a la estética de cada local.
Nas comarcas onde l’asturllionés ye llingua propia –como aquella na que se desenvuelve esta campaña–, l’idioma vive principalmente “en casa”, ausente de rétulos y señalizaciones públicas. Nesas circunstancias ye frecuente confundir los efectos conas causas, ya muitos falantes chegan a pensar que la súa llingua materna nun val pa usase nos ámbitos públicos o formales, o mesmamente na escritura. Por esa razón, parez necesario fomentar la visualización de la llingua asturllionesa a fin d’amostrala abiertamente y con dignidá, superando desprecios y vergüenzas antiguos que tienen que quedar barríos definitivamente d’una sociedá qu’ha de mirar al futuru sin facer de menos la cultura popular heredada de las xeneraciones que nos precedioron.
La campaña de normalización “Na llingua de casa” escomenzóu esta sumana en Torenu, pero está pensada pa estendese por tódolos territorios falantes d’asturllionés de Llión y Zamora, precisamente aquellas zonas onde la llingua tien una visibilidá menor. Una de las características de las propuestas de retulación ye precisamente la d’estar adaptadas a las distintas variedades del idioma, de manera que favorezan una mayor identificación de los falantes conos rétulos. Nos meses próximos los carteles van repartise tamién por outras comarcas de Llión y Zamora.
Con esta campaña El Teixu quier dar un pasu más na defensa de la llingua asturllionesa, amostrando non solo que sigue viva entre los bercianos, sinón tamién qu’hai xente dispuesta a usala y visibilizala si se-ys dan las oportunidades de faelo. Esti llabor, que tendrían qu’estar fayendo la Xunta de Castiella y Llión y outras alministraciones públicas, queda güei en manos de la voluntá y l’esfuerciu de las asociaciones civiles, pero non por eso El Teixu va faltar al sou compromisu cona llingua asturllionesa y los sous falantes.
El Teixu, Rede pal Estudiu y Defensa de la Llingua Asturllionesa ye una asociación fundada nel añu 2007 n’Estorga por xente de Miranda del Douru, Zamora, Llión y Asturias pa defender l’asturllionés dende la súa unidá y el respectu a las variedades internas. Pa ello desenvuelve actividades d’estudiu, divulgación y promoción por todu l’ámbitu del idioma.
Fuente y más info: http://elteixu.org/el-teixu-inicia-en-torenu-una-campana-de-normalizacion-del-asturlliones/#more-329
