Faceira, Furmientu y El Teixu editan un cartel colos nomes de los animales de Llión y Zamora en llionés
Las asociaciones en defensa de la llingua asturllionesa Faceira, Furmientu y El Teixu editan conxuntamente el cartel “La nuesa fauna”, que recueye los nomes populares en llionés de quince de los animales más representativos de Llión y Zamora. Los carteles, que se van presentar na IV Xornada de Patrimoniu Llingüísticu y Cultural, en Villamejil (Cepeda), repartiranse de balde a las escuelas de las zonas falantes d’asturllionés, amás de ponese a la venta en llibrerías.
Editada conxuntamente por Faceira, Furmientu y El Teixu, esta lámina recueye los nomes tradicionales en llionés de seis aves y nueve mamíferos característicos de la fauna de Llión y Zamora.
De la raposa a la doronciella y de la pega a la curuxa, las tres asociaciones escoyeron quince de los animales más representativos de la fauna de la zona pa representalos nesti cartel col obxectivu de que nun s’esqueizan los nomes qu’aínda tienen nas zonas falantes d’asturllionés. L’afán didácticu de la lámina vien reforzáu polas guapas ilustraciones d’Alejandro Fernández Giraldo, asina como pol fechu de que, nos casos onde ye necesario, se recueyan distintas variantes del nome.
Subscriben esta nota las asociaciones en defensa de la llingua llionesa que siguen: Faceira (Llión), Furmientu (Zamora) y El Teixu (Asturias, Llión, Zamora y Bergancia).
Fuente y más info: http://faceira.org
