Vemos con recelu la propuesta ya que la situación del llionés de discriminación yia más que conocida. El compromisu cona llingua iniciase cona sua utilización interna y nas instituciones onde se gobierna creando’l marcu normativu afayadizu nel ámbitu de las suas competencias, lo demás manoseo y postureo políticu. Seguimos proponiendo dende Alantre la creación d’una Axencia de Protección y Desarrollu del Llionés y Galego, con presupuestu que desarrolle un Plan Estratéxicu de política llingüística, dientru una Llei de Promoción y Usu del Llionés y Galego.
24/04/2024: Estorga. Dende ALANTRE consideramos una buena nueva que’l PSL impulse una iniciativa favoratible a la nuesa llingua, instando a las Alministraciones autonómicas a la sua protección. Cumo la situación del llionés nun yía nueva, sinon conocida la discriminación llingüística qu’eillos mesmos esgrimen, vemos nesta propuesta con recelu por deillos motivos;
Primeiru, dende la instituciones onde gobiernan dientru del ámbito llingüísticu de la llingua, salvu Trueitas y más por voluntá personal que por política de partidu, enxamás propusienon una normalización nel sou ámbitu municipal, cumo ALANTRE fizo nel Ayto. de LLión conos documentos nun oficiales, ou propusienon nos sous programas una normalización na Toponimia de llugares onde gobiernan ou gobernanon cumo El Fabeiru, Bembibre, Ñugareyas, Igüeña, Villamejil, Vil.lablinu ou Torenu, por exemplu.
Segundu, las declaraciones del Alcalde de LLión falando en términos discriminatorios p’hacia la llingua autóctona de los llioneses, amuesa ou intuyese qu’esta propuesta nun dexa de ser un brindis al sol cumo nel sou día fonon d’outros partidos.
Terceru, enxamás cumo partidu, nin na documentación interna nin na propaganda ou campañas, utilizanon la llingua llionesa onque sia de forma simbólica, las llinguas son erbias de comunicación, si la intención braeira yia caltenelas hai qu’utilizalas, cenciellu.
Ya pa finar, dende Alantre queremos decir a tódolos partidos ensin esceicion dalgu nidiu; la llingua protexese utilizándola interna ya institucionalmente, y onde se gobierna tien que creyase un marcu normativu ya institucional nel ámbitu de las suas competencias, onde la sua utilización por pequeña que sia garantízese, lo demás palabrería unos pa utilízala cumo elementu diferenciador y outros por tactismu políticu y bañu llionesista.
Nosoutros ya planteamos cousas craras, y asina dixímoslu en comunicados cumo’l pasadu 21 de febreiru nel Día de las LLingua Materna, na que proponíamos y seguimos proponiendo la creación d’una Axencia de Protección y Desarrollu del Llionés y Galego, con un presupuesto asignado y compuesta por representantes académicos, sociales ya institucionales, así cumo elaborar un Plan Estratéxicu de política llingüística, todu eillu dientru del sofitu normativu con una Llei de Promoción y Usu del Llionés y Galego. Esto, y el sou usu, yia compromisu afitadu y rial col llionés, lu demás, cumo está propuesta, paeznos fuegos d’artificiu y postureos psedollionesistas, la llingua nun ta pa más trapayadas, engaños y manoseos.
