Xuntanza ye una iniciativa ciudadana con un obxectivu y articulación que xiran alredor de la configuración del puebru llionés cumo subxectu soberanu, que construya y avance hacia una sociedá socialmente xusta, igualitaria y medioambientalmente sostenible, que lluite y dinamice una nueva visión social más democrática y participativa dende un marcu propiu.
Por ello, llevaran a cabu tanto de xeitu directu cumo colaborando con outras entidades ou organizaciones las acciones empobinadas a desenvolver los eixes que presentamos nesta su web.
Cren nun proxectu abiertu, social y propiu cumo llioneses, au podemos asganzar más a xeitu los nuesos obxectivos sociales y económicos deseyaos, chegando a un equilibriu ente las desixencias d’institucionalización social (modelu de sociedá, económicu y réxime políticu internu) cona coherencia ideolóxica de que los llioneses tengan una soberanía política plena.
Deben instar, colaborar, favorecer pa que s’abra un nuevu procesu constituyente, a traviés d’un movimientu ciudadanu, col envís de la creación d’un estáu plurinacional, au los llioneses, cumo subxectu políticu activu, accedan d’igual a igual a las máximas cotas d’autogobiernu y empoderamientu.
El procesu tien que venir asentáu no reconecimientu de la singularidá, soberanía y dereitu d’autogobiernu de las desemeyadas naciones que conforman l’estáu. No que se respete al puebru llionés el dereitu a decidir la relación que quier tener llibremente sobre la base de la igualdá y non la subordinación, el sou réxime políticu, social y económicu internu.
Los llioneses cumo subxectu políticu tienen el dereitu al sou desarrollu y acción efectiva nas mesmas condiciones que cualquier puebru del estáu, européu ou del mundu, si asina lo decide una mayoría social, instando la sua positivación nel ordenamientu xurídicu del estáu español.
Mas info: http://www.xuntanza.info
